<
|
Document Information
|
|
Title |
: |
المزاد
|
|
Transliterated Title |
: |
al-Mazād
|
|
Author |
: |
خالد الصاوي
|
|
Publisher |
: |
None
|
|
Keyword(s) |
: |
Works,Theater.
|
|
Type |
: |
Book
|
|
Language |
: |
Arabic
|
|
Date |
: |
3/18/2006
|
|
| |
|
|
View |
: |
|
|
|
Description: |
|
|
|
(مع دخول موسيقى هادئة يدخل شابان "الولد والصديق" يسيران على مقدمة المسرح.. الولد يحمل حقيبة، الديكور والأزياء والإضاءة يخلقون جوا أسطوريا خالصًا، يتوقفان بعد برهة).
(1) كفاية كده.. مع السلامه انت
(2) حوصلك
(1) ما خلاص.. وصلنا
(2) انت مصر؟
(1) طبعًا.. أقولك.. بلاش نتكلم في الموضوع ده
(2) ده آخر كلام؟
(1) طبعا
(2) حنتقابل؟
(1) يمكن.. يعني إن شاء الله.. طبعا
(يتصافحان)
(2) مع السلامه
(1) الله يسلمك
(2) مش عايز حاجة؟
(1) لا.. خالص
(2) أشوف وشك بخير
(يتحرك خطوتين.. يتوقف.. يستدير)
ممكن تفكر تاني؟
(1) لا
(2) ليه لا؟
(1) مع السلامه
(2) حنتقابل
(1) قول إن شاء الله
(2) لازم حنتقابل.. وحنرجع تاني زي زمان.. أنا واثق من كده.. حنرجع أحلى من زمان كمان.. أنت عارف، قرارك ده عملي هزه في كل حاجة. قرارك ده غربلي أفكاري.. أنت فاكر انك كده بترمي كل حاجه وراك. لكن بالعكس.. صدقني.. أنت لا زلت متمسك بكل حاجة.
(1) ما تحاولش تقنع نفسك بالكلام الأهبل ده.. أنا فعلا بايع
(2) لا لا مش صحيح.. أنت عايز تمر بتجربة أنا عارف.. أنا عارف كويس.. عارف أكثر منك
(1) مع السلامه
(2) الله.. يسلمك (يتحرك خطوة ثم يستدير مندفعًا نحوه ويحضنه ثم يخفي دموعه وهو يعدو خارجًا ويصيح).
مع ألف سلامه
(يتحرك (1) متابعًا السير، تستوقفه حركة وراءه، يلتفت يجد البنت، تنظر إليه، تحمل لفافة في يديها، تعدو إليه تضع اللفافة في يديه وتستدير راكضة.. يصيح)
(1) استني
البنت عايز حاجه؟
الولد أنا مش محتاجلهم
البنت معلش.. دول حاجة مني
الولد انت فاكره ان دول هم اللي حيفكروني بيكي؟ غلطانه يا حبيبتي.. الحاجات دي كلها كلام فارغ.
البنت كلام فارغ؟
الولد طبعا.. صورتك معايا والشجر ورانا والشمس نصها باين.. ونصها غرقان في الميه (يبتسم) ونص القلب في السلسلة.. والورده اللي اديتهالك من زمان ونشفت في كراسك.. صدقيني يا حبيبتي كلام فارغ.
(تعدو)
الولد اسمعيني هنا.. لآخر مرة على الأقل.. فيه حد فاصل بين الحاجات طول عمرنا كنا بنتناساه.. كان لازم يتحط من زمان.. كل الأشياء ملهاش معنى
لو ما كانتش في إيدينا مملوكه لينا لوحدينا.. الأشياء ملهاش معنى لو ما كانتش من لحم ودم.. أشياء حقيقية نلمسها ونشمها وتبات في حضننا في بيت جدرانه من طوب وفرشه من خشب حقيقي نشم ريحته ونستريح فيه.. على كراسيه وعلى سريره.. وننام على مخده واحدة في حضن بعض للأبد كان نفسي جدا جدا.. أنا تعبت.. تعبت من كتر الحاجات اللي مش حقيقية.. الحاجات اللي مش بجد.. كوخ على قمة قمم الجبال والشمس بونبوناية من بعيد ندوقها واحنا طايرين من السعادة.. كلام فارغ.. لازم نواجه الحقيقة.. بقوة وبشجاعة..
البنت مع السلامة
(تتوقف وتستدير له) حستناك
(تعدو خارجة)
الولد (يصرخ) يا غبية بقولك عاوز حاجات حقيقية تقوليلي حستناك؟
اتفلقي.. غوري في ستين داهية..
(يستكمل سيره.. ينكشف المسرح.. نرى ديكورا يوحي بغابات وأحراش.. مرور زمن.. يتوقف.. يفتح الحقيبة.. يخرج جرسا يهزه بحزن ورزانة)
قرب.. قرب.. جلسة مزاد علني.. مزاد.. مزاد..
يدخل (4) وبعد برهة يدخل (5)
(4)شخص هستيري فيه إيه؟
(1) فيه مزاد
(4) الله.. مزاد؟
(1) آه
(4) جميل.. جميل جدا.. أنا بحب المزادات خالص
(1) هو مفيش حد غيرك في البلد دي ولا إيه؟
(4) لا فيه طبعًا.. بس أنا معرفهمش كويس
(يدخل (5))
(1) قرب يا أستاذ.. اتفضل
(5) فيه إيه؟.. (5 شخص شكله صارم وعدواني)
(4) فيه مزاد
(5) عظيم.. ابدأ.
(1) طيب لما الناس تيجي
(5) هو احنا مش عاجبينك ولا إيه؟
(1) مش القصد.. بس يعني فيه مزاد من غير ناس؟
(5) الله الله الله.. أنت بتغلط؟
(1) ليه أنا قلت إيه؟
(5) هو احنا مش ناس؟
(1) لا ناس كتير اقصد
(5) كتير ولا قليل.. بكام؟
(1) مش تعرف ببيع إيه الأول؟
(5) أي حاجة.. أي حاجة.. بكام؟
(4) آه صحيح بتبيع إيه؟
|
|
|
|
